بيني وبين ولدي ذي الست سنوات

ماما...
ماما...
ماما...

نعم يا إبني ماما ماما ماما هو فيه إيه

ماانتي ما بترديش

مانا بعمل حاجة...خير يا سيدي

عايز فلوس أكثر في النادي

ليه

هشتري حاجة من المعرض

حاجة إيه

أي حاجة وخلاص

مفيش حاجة اسمها كده... لما تشتري حاجة لازم تكون عارف هي إيه ولازم تكون محتاجها، مافيش شرا من أجل الشرا

يعني إيه من أجل

يعني علشان، المقصود مفيش شرا لمجرد إنك تروح وتشتري لازم يكون هناك سبب واحتياج

هو إحنا فقرا علشان كدة مش عايزة تديني فلوس

مالهاش دعوة بالفقر يابني

ماما ماردتيش على سؤالي هو إحنا فقرا

حبيبي الفقر مش عيب وربنا بيحب الفقر أكثر من الأغنيا

أمال سايبهم فقرا ليه

بيختبر الأغنيا

إزاي

بيشوف هيدو الفقرا فلوس ولا لأ

طب ما يختبر الأغنيا علطول...

مش عارفة يا سليم

مش عارفه إيه

مش عارفة أرد عليك

إزاي مش إنت أم

أيوة بس الأمهات مهندهاش كل الأجوبة

ضاحكا بلؤم....طب الأمهات عندها فلوس علشان النادي؟؟


....................................................
.....................................................

ماما

نعم

هو إحنا ليه مش عايشين في بيت بجنينة

هو ده البيت اللي ربنا رزقنا بيه، وده بيت أصلا رائع وآلاف الناس تتمنى يكون عندها بيت زيه، وبعدين إحمد ربنا يا سليم في ناس معندهاش بيوت وعايشين في الشارع...

هو إحنا فقرا...

يابني من كتر ما بتسال هو إحنا فقرا هنفتقر، وبعدين الفلوس مش كل حاجة المهم إن إحنا مع بعض وإن بابا في وسطنا وإن إنت وعايدة كويسين... إنت عارف لسه بابا جايله شغل في دولة بعيدة وبمرتب مكبير ومارضاش يروح علشان يفضل معانا وما نتفرقش...

هو فعلا عمل كده...

أيوة يا حبيبي

إلتفت للأب الجالس على مكتبه يعمل...إزاي يا بابا تعمل كده إزاي...إنت مش عايز تبقى غني زي كاكا وزي مسي لو عزت موتيسكل تجيبه ولو عزت تروح أسبانيا تروح ولو عزت تروح نادي برشلونة تروح...مش عايز ولا إيه...

لأ مش عايز يا سيدي... وبعدين دول لعيبة كورة...إحنا شغلنا هنا...قالها وهو يشير إلى رأسة وزاد...وبالورقة والقلم...يا سليم...إحنا اللي بنبني بلدنا حته حتة من كل ركن، من مكتب محامي يدافع عن الحق، من مكتب قاض يحكم بالحق، من مكتب مدرس بيدرس بضمير، من مكتب دكتور بيعالج الناس بأمانة...هو ده اللي بيفضل يا سليم...لكن تعد تسافر وتتنطط وتجري ورا الفلوس مش هتبني حاجة خالص...

تاني يوم على الفطار قال الولد بهمس لأمه...ممكن أسالك سؤال...

ايوة إتفضل...

هو بابا ينفع يرجع في كلامه ويوافق؟؟