ولاد سليم أفندي...

ولاد سليم أفندي رجالة...
من ظهر متين طالعين...
زي الضلع الصلب اللي منو خارجين...
مولودين على ريجليهم واقفين...
من صغرهم رضعوا بذور الإيمان وفي قلبهم مغروسين...
الله... فرجها وموسعها...
غيرهم يكونو أولا مفتكرين...
وبنعمة الله شاكرين...
ولا يكونوا فيها طالعين...
وعلى ما أعطى ربك محافظين...
حتى اللقمة الصغيرة...الطبق بيها ماسحين...
لجل ما يبارك ربك في النعمة...
بالنبي خير الخلق أجمعين...

علطول... مقتديين...
ولما تضيق...
والخبطات تيجي من الجنبين...
تلقاهم رجالة صامدين...
من أول اللي في السبعين...
لحد اللي ما كمل الأربعين...
الله عليهم...
رجالة...
بينهم وبين الصبر حبل متين...
عارفين...
إن اللي بلانا بالامتحان...
شايل الجواب عنده للموقنين...
وإن الرزق بتاعه...
مديهولنا لحين...

وبيعوض الصابرين الطاق طاقين...
واللي يسقط في الامتحان...
مش طالع من نفس الضلع المتين...
صحيح مركبنا خطفوها الصوماليين...
لكن الإيمان هدية من رب العالمين...
يديمها علينا ربنا ليوم الدين...
ويخلص رجالتنا وأهلنا اللي فوق المركب مستنيين...
فرج...
خالق الكون ومسبب الأسباب...
يا معين...
أمال...
كل اللي من عند الله...
بيه راضيين...
وعارفين...
إن عين الله...
حارسانا أجمعين...
رجالة ولادك...
يا سليم أفندي...
وهتعدي...
زي ما غيرها أصبح ذكري...
عندهم وعندي...
وبركة عملك...
قاعدالهم...ومعديا إن شاء الله...
لحد ولدي...
بالرحمة يشملك ربي...
لأمي ولجدتي وليك بدعي...
الله يرحمك يا سليم أفندي...