ولد وبنت...

عالكنبة...عفقاه.....

كل ما يفلت من تحت دراعها...

تسحبه تاني نحياتها...

متنرفز من خانقتها...

ويزغر ليها...بطريقة زعلتها...

ويقوم متزرزر...ويبعد عن حتتها...

مقموصة طبعا حضرتها...

وتعيط وتقول...

هو ليه سليم...أخويا حبيبي...

غلس كده علطول...

وتترمي فوقي في حالة عياط ...مش معقول...

...

...

صاحية الصبح في حالة انتعاش...

بتضحك وتهزر مع كل الناس...

يبص هو ليها باندهاش...

ويسأل وهو في حالة إنكماش...

هيه ليه دايما عيودة...

علطول كده بتضحك...

وترقص...

ومبسوطة؟؟؟

ويكشر...ويبعد قبل...

ما لحق أقول...

أي شئ مقبول...

...

...

جاية من الحضانة تعبانة...

لكن بالحماس مليانة...

بتحكي وتقول على اللي حصل...

وبتفتح تشوف الأكل اللي في الحلل...

تضحك وتسرخ وتقول...

يا ناس جعانة...

عايزه بطني علطول مليانه....

...

...

جي من المدرسة...هلكان ...

بوزه شبرين وتعبان...

يطلع من معضلة لمشكلة...

الأكل ده مش عايزه...

طعمه وحش ومش غاويه...

أنا داخل أنام...إعملولي اكلة مجنونة...
علفكرة...عمركو ما بتعملو مكرونة...
إلا لما أزن وأعيط ...

وبعدين تقولوا زنان وآل إيه...

سليم ده واد مش تمام...

...

...

عارفين دول مين؟؟؟

ولد وبنت...الاتنين...

مطلعين عين أبوهم وأمهم...

بشقاوتهم وحبهم...

أبصلهم...

وأشوف نموذج لكل راجل وست...عرفتهم...

أد كده من الصغر الطبع غلاب...

مهما علمتهم...

...

...

كل ديه أمور... مش قد كده حجمهم...

مجرد حاجات تخصهم...وحدهم...

المهم يكونوا مقبولين عند ربهم...

ما يقفلش السكك في وشهم...

ويكونوا إضافة لوطنهم...

وأهلهم...