عمتو زيزي مرة تالتة...

متكية على الكرسي بهداوة...

مايلة راسها برواقة...

بصيت كويس في العيون...

لمحت برق قوي لكن حنون...

بيقول هحارب للحياة رغم الجنون...

رغم المفاجأة...رغم مرض ملعون...

البرق برق في العيون...

وبثقة المقاتل العنيد كانت رسالته وكلمته...

بأمر الله...
كله يهون...

...

...

متكية على الكرسي بهداوة...

مايلة راسها برواقة...

بتبص على الأحفاد والأولاد بسعادة...

بتقول نصايحها الوقادة...

طريقتها البسيطة المعتادة...

زيزي ست الكل...

في الزنقة والحزن قبل الفرح سدادة...

والنصيحة واجبة قبل التهاني المتزوقة بزيادة...

دي قولة الحق واجبة على القريب...

قبل ما تيجي منك يا غريب...

مسؤولية مش بالكلام...

بالفعل قبل القول...

على طول الأيام...

...

...

في عنيها...البرق نطق...

بصوت هادر...

عليك قادر...

مش قدي مهما تكون غادر...

أنا جذر ضارب بقوة...

وما تمنع فروعي من الإمتداد...

أي قوة...

مش شايفني في كل بيت؟؟

في طول الأرض وعرضها عديت...

ما يوم مني ريح نالت...

ولا هد الهوا على قوته...

اللي بإيدى بنيت...

وبكل خطوة خدتها... عليت...

...

...

على إيه بتتمدد كدة...

حكايتك من الآخر منتهية...

بنقطة تنزل م القلب دغري...

تكوي الخلية...

والعزم عندي صحيح هادي...

بس مش عادي...

صولات ياما عشتها...

جولات ياما خضتها...

في الحلبة... ديا...

أكيد...
نتيجة الجولة هتتحسم...

بإذن ربك... ليا...