ندى...

ندى بنت أمورة...
زي الملايكة في قعدتها...
وهي صغنطوطة...تعدل فستانها...
لجل ما يغطي ركبتها...
جدا كسوفة...
كبرت البنوتة...
من المدرسة للكلية...

متباركة الخطوة وصاحبتها...
في الروحة والجاية...

...نني عين والدتها...
وفرحة نينتها...
مدفية بحضن أسرتها...

والكل يدعي عند شوفتها...
يا رب يبختلها...وفي نصيبها يباركلها...
راحت الأيام...والفرحة زارت بيتها...

كانت أحلى ليلة ليلتها...
بالفستان الأبيض...نورت حتتها...
الله عليها...
زي القمر في تمامه...البنت فلة...طالعة لجدة مامتها..
بعد تمام العام...
راحت الأيام...

جت حكاية مش تمام...
البدر وشه وارم...محتارة الحكام...
وجه الخبر الأليم...
اتسلل للفرحة اللئيم...
ياه...إختبار صعب من رب العالمين...
قدر والطف يا رحمن...
يا رحيم...
...كرمك علينا... رجاء من المبتلين...
ندى...
ربنا معاكي يا بنتنا...يا نوارة دايما وسطنا...
يتمم عليكي المعافاه...قادر ربنا...
...ده كلمته...
كن فيكون...
ويتسهل الصعب ويهون...
دعوة الناس معانا...
ربنا يزيح اللي بيه بلانا...
ويلطف بعبيده ...
وما يفجعش حد أبدا في وليده...