دايرة...


رجليهم في السرير طالعه من تحت الغطيان الاتنين...

....نايمين...طيبين حلوين...

لا سريخ ولا طلبات وزن ولف من الشمال لليمين...

عيلين...صغيرين...

أبصلهم...ترغرغ العينين...

يا ترى هنعدي بيهم من السنين...

وتقلها...والتحديات...وأحيانا كتير... فشل وعذاب وحب وحنين...

يا ترى هيصلبوا طولهم أصاد...الجبارين...

من البنى آدمين...

اللي ساندين أوي كده ومتكين...

يا ترى هيكونوا من الصالحين...؟؟

أنا أصلي قلقت في نص الليل من يومين...

فتحت التلفزيون...
وشفت فيلم عن الأولاد الأفريقيين...

خطف... دمار وفساد...ورجال صغار محاربين...

واللي يدولهم السلاح باليمين...

آل يدو مساعدات...لانقاذ اللي فاضل منهم عايشين...

لازم تفضل دوامة الماس...والسلاح...والرق والهيمنة مستمرين...

علشان قصور بحمامات سباحة...وخاصة يا حراسة...

وفي البنك السويسري ما تزيد الملايين...

يا لوعة الأم على ولدها... لما يتخطف من حضنها...

تبرعا لجيش مرتزقة مسلحين...

فين الرحمة...فين العدل...معادلة صعبة أوي على عقلي المسكين...

يوم طويل...ونط قلبي مكان عقلي ومش بفكر إلا بالبطين...

هاخد حباية مهدئ وأحاول أنسا أفريقيا والأفريقيين...

بكرة يوم جديد ليه وللعيال اللي من تحت الغطا طالعين...

في الصبح...هنمسك البلاي ستيشن...
...واعلمهم إزاي يغلبوا كل الأشرار الوحشين...

يارب...لما يكبروا تكون إديهم عفية...ويكسروا دايرة العبودية... والاستعمار...الملعونين...

اللي رغم كل حركات تحرر الشعوب لساهم دايمين...

....

....

هناء...

جيبالنا هدية...

هيا... أمورة فرنساوية...

وريم.... حتة... شضلية...

بس الجوز...قطعية هايلة...

واخدين عنها...طباعها العالية...

هي هناء...البنت...الست...اللي هية...

....

....

هناء...

عليها حركات...آه منها هية...

النهاردة...

بحتة نميمة وفكرة عالية...

منها ...لية...

ِعِرفت...بمكالمة هاتفية...

اني خدت...درجة...مش اللي هية...

بس لو ماكنتش...

بنت الغالية...

يلا... سماح النوبة دية...

....

....

حتى والله من غير ورد...

رسول...الجمال...

وحامل الود...

هدية لمس سوسة

بعد التلاتين بزمان...

كنت هناك...أنا...

دلوقت بقيت هنا...

بَصِلي بحنان...

ووصل لعقلي بكل اتزان...

معاه كانت البساطة والاطمئنان...

مدلي إيده وعَدِينا...

في زورق الأمان...

....

....

لما أسأل نفسي الآن...

ياترى... على أنهو ضفة ...الهنا...؟؟؟

من غير مواربة...وزوغان...

الهنا عندنا...

جوه في قلبنا...

مش مهم على أنهو ناحية خطونا...

رغم احتلاف حياتنا عن بعضنا...

لو الناس سبتنا لوحدنا...

هنعرف إزاي نقبل وضعنا...

وهنلاقي السعادة بنفسنا...

....

....

وعشان...

نُصدق في القولان...

لازم أبوابنا...

نفتحها..ونآمن...

بتغير الزمان...

متأخرة...


عينيه طيبة و مليانة...

بيبص...بسعادة...

ومكار...لما بيطلب... أيها... حاجة...

النهاردة ...

وأنا بفتح باب البيت...خادني من إيدية ...

وبصوابعوا الصغننة...

شاورلي على الشباك وقال...

ليه كده عني ...متأخرة...

الشمس مشيت بالراحة...

وخلاص هنام...مرتاحة؟؟؟

في دوكة دلع...شرحتله...
وفي الآخر قلتله...

يلا ميعاد...الحدوتاية...

رد بمنتهى الحماس... أوكي...

بس يكون فيها شرير...مش عايز أمير...

ردت أخته...

لا...لا...

عايزة قطة...

صوغانطوطاية...

خدتهم في حضني...

وصدقوني...

معرفتش...

إيه اللي حصل إن كان للقطة أو للشرير...

في صفحة...النهاية...

جيت ...


جيت...
من شغلي هلكانة...
قابلتني بنتي بالأحضان...
وقالتلي...كل ده تأخير...أنا زعلانة...
وجريت جابت لعبة أدوهالها في الحضانة...
ماما...أمي...مامتي...
ممكن تيجي معايا...نلعب باللعبة...
في المية...المليانة...
قلتلها صدقيني... أنا تعبانة...
ومغلس عليا زميل في الشغل...فطالع روحي...وطهقانة...
بصتلي في عنية...
ولفت إيديها حوالين إيدية...
وقالتلي بمنتهى الحنية...
إلعبي معايا شوية...
وأنا هديلك بوسة...

وحضن...

ولحسة من المصاصاية...
...بعد الكلام ده...
هقول أنا إيه...
غير بس...حاضر...و طبعا ...من غير ليه...
علشان عيونها الحلوة...
وبوستها العسلاية...

الأسعار...نار


غلوا امبارح...البنزين والسولار...

و بالبدلة الرييه الزرقة اللي سعرها حراق...نار...
و الضحكة الصافرة قال الوزير...
بمنتهى الثقة و الاقتدار...

دي أول حزمة اصلاحية...

اخترناها بدقة...من مجموعة أفكار...
المواطن الصح يحمد ربه ان اتخذنا ده قرار...
دي سياسة لصالح أفراد الشعب...

اللي مش حاسين بالعالم والكون الدوار...
البترول غَلى في العالم كله الأسعار...
ساعدونا علشان... نقضي على الفقر في البلد دي...و الانكسار...
هنشيل الدعم بإيد خفيفة وبافتخار...
لجل مانكون زي الهند وكوريا وغيرهم من الأمم الأخيار...
بدل ما بعد عشر سنين...ترجع تقولي صبرنا كتير...إيه الأخبار؟؟؟
....
....
بس سؤال محيرني معاليك...
والنبي تجاوبني الله يخليك!!!
إيه حكاية إنه بدل السيطرة على الأسعار...
الناس لازم تسعي لزيادة دخل الدار؟؟؟...
آه...فهمت... ده باعتبار...
ان التعليم عندنا درجته امتياز...ولكل البلد متوفر...
بيطلع الواد من دول لهلوبة في الانجليزي...و للكمبيوتر بس يأشر...
ياه ولاد الإيه متأسسين صح الصح...وفرص العمل عنهم مرصوصة رص....
لأ صراحة فكرة ممتازة...عليها بجد تشكر...
ربنا يستر...
هتعمل البلد ديه إيه...من غير...
المجموعة الاقتصادية....

و الحزم الإصلاحية....

وكل الأفكار دية...
....
....
حوالية... الكل بيعاني من الأسعار...
من إزازة الزيت اللي بتتباع باتناشر جنيه...

وشكارة الرز اللي وصلت لتمانية وعشرين جنيه...

وكيلوا اللحمة اللي الناس مقدرتش...في سن المعاش... تمدله ...
وطلع بره... حتى قبل ما يوصل ستين جنيه...

...والفراخ البانيه ...اللي عدت تلاتين جنيه...
ناهيك عن سعر لبن العيال...البدره...
ولا أدوية السكر والضغط...والأزمة...

لا...ماعادش ليها أي لازمة...
الكل مودع بدري بدري...لأنه...

هتجيلوا من كلام المسؤولين ألف أزمة وأزمة...
....
....

إلا قولي معاليك...

دي سياسة سعرية...

ولا خبرية...

بتقول فيها حكومتنا الهمامة...

اللي فخورة ورافعة الهامة...

أطلقنا على

جموع الشعب...

الطبقة المتوسطة...

اللي طالع روحها...وتعبانة...

رصاصة الرحمة...

يلا بألف سلامة!!!