شوفتو البنات...

شوفتو البنات...

علفكرة جد مش مجرد كلمات...

خرجوا من توب الموضات...و جمال الشكل...وتفاهه الحاجات...

بيقودوا بلدهم...لمستقبل آت...

مرة إضراب...ودلوقت هيقلعوك يا إيشاربات...

علشان يقولوا للعالم بصوت عال شايفين...شاهدين... انتهكت الحرمات...

حرمة البنت والبيت ...وكل اللي عشنا سنين محوطين عليه ورضينا لجله بالظلمات...

....

....

شوفتو البنات...

أد إيه فرحانات...

تلقاهم بيلعبوا مع بعض...حادي بادي من غير خنقات...

وفي العربية باصين من الشباك سرحانات...

أحلام جميلة...وعيون مليانة...حكايات...

في المدرسة...شقاوة حلوة وأحيانا تلقاهم عصابات...

لكن تردهم حنية قلبهم...وكلمة صغيرة من الأبلات...

خصل وضفاير طايرة مع النسمات...

ياربي أد إيه طعمات...

....

....

شوفتو البنات...

مليينك يا مظاهرات...

ولبلدنا مضحيين ...ما بقتش بس شعارات...

وفعلا مؤمنين بالتعبير...وتغيير المجتمعات...

سابوا صباع الروج وشالوا بداله يافطات...

بينادوا بالعدل...في كل الاعتصامات...

....

....

هشوفك يا بنتي زيهم...تقدسي الحريات...

وما لكيش إلا في الروايات وآخر الإصدارات...

وحابة بلدك منصورة وقوية...

ومقدرة المسؤولية...

وحاسة ببنات بلدك المضطهدات...

هشوفك شجاعة...

مش هيابة...

مقدامة...

في الحق أقوى من قسوة أي هراوات...

هشوفك زي دول بنات...

....

....

عايشة...أنا...

علشان أشوف ضحكتك...

وصرامة نظرتك...

وتساؤل بصتك...

علشان أشوفك...كلك كده ...

نجمة...

بضي الحق لامعة في سبع سموات...