الله عليهم...

على محور ستة وعشرين يوليه...

الصبحية...

بجري بسرعة بالعربية...

هاخد شهادة ولدي النهائية...

ولازم أرجع تاني كل السكة دية...

علشان ألحق معاد في المكتب... لوفود أجنبية...

شفت اتنين سابقيني شوية...

الراجل سايق العربية...

بصورة بطيئة مش اللي هية...

والست مصرية تقليدية...

محجبة بطريقة عادية...

ماسكة حتة عيش طرية...

بتقطعها وتأكلهاله...

وتبتسم بحنية...

يبصلها بحب وملاغية...

ترد البصة بطريقة شقية...

نسيت معادي...وكل اللي عليه...

سرحت معاهم ومع أغنية...

"مش محتاج أتوب حبك مش خطية"...

عديت من جنب العربية...

لقيته مربي لحية...

دققت ...ملقتش بندقية...

ولا في إيديه... قنابل عنقودية...

كل اللي لقيته...

إن في حضنه ...هي...

ونظرة عينه بالحب راضية ومتهنية...

الله عليهم...

أكيد ...لون الحياة في عينيهم...حاجة تانية...