عيد العمال...

في عيد العمال...

هقول إيه لميشيل...وعبد العال...

عايزين يسمعواعن...تحسن الأحوال...

حقيقي آسف... مالناش على صناع القرار أي دلال...

ستات العمال...مضربين عن أداء أي أعمال...

وفي حوش المصنع قاعدين محتجين مع الحلل والعيال...

والهدوم منشورة في المصانع على الحبال...

علامة احتجاج أكيدة...مش محتاجة سؤال...

....

....

مش عايزين يقلبوا البلد ولا نظامها المستقر العال...

ولا بيطالبوا بشواطئ خاصة في مارينا للعمال...

السؤال عن لقمة عيش...بس تكون... بالحلال...

المصنع... قضوا فيه من عمرهم بلا عدد...أكم ليال...

والمَكن... حياتهم الدايرة لجل ما تتحقق الآمال لهم وللعيال...

والعمل عندهم مش للمصيف...ولا لشارم...وهدوم...وموضات...من كل الأشكال...

ده عيشة...دروس...ومدارس...وكسوة...ولقمة على قد الحال...

....

....

مش ممكن بعد كل ده يتقال...

وبكل قسوة وتعال...

معاش مبكر...ده نهاية المقال...

أو خدتم كفاية...مستكترين الباقي على أرباب الأعمال...

....

....

ألف رحمة ونور عليك يا من كنت محافظ على كرامة العمال...

عايزين زيك رجالة...مايهموهمش في الحق أي أقوال...

لا صندوق النقد...ولا البنك الدولي يملوا عليهم الأفعال...

خايفين على بلدهم وأهلها الصابرين...شيالين الأحمال التقال...

رجالة...عارفين إن بلادهم حقيقي...نصها فلاحين وعمال...

مش عايزين يلغوا النسبة...لجل ما يخدوها محاسيبهم... رجال الأعمال...

هيجود الزمان بمثلك...ولا...

الصفحة مالياها صورتك... واتمد خط اسود يمنع بعدك عبور الرجال؟؟؟