بلدي مضربة...

بلدي إمبارح كانت مضربة...

لأول مرة شوارعك يا مصر ماتكونش على آخرها متقفلة...

كل الناس الطيبة...

كانت في بيوتها...تعبانة...متوترة...

وفي سابقة...على العائلة المصرية...

الولاد ما رحتش يومها......ثانوية أوابتدائية...

....

....

بس ظهرت مشكلة...

في مدينة المحلة...

الناس اللي مكوية ووالعة...

بسعر رغيف العيش...ومعاملة الشاويش...

سابوا الإضراب وصرخوا بأعلى صوتهم...ياناس مش عارفين نعيش...

هيطلع المحفلط والمزفلط...يصرح...لأ... محصلش...مفيش...

أو...هيتقال... التغيير له أصول أبدا ما تتنسيش...

مش بالشغب والتكسير...دول غوغاء ما يفهموش...

أدب المواطنة ما يعرفوش...

....

....

طبعا...ما... هو... ما تكواش...

بقلة المعاش...

ولا شاف كسرة عين العيال... من قولة ...مفيش...مامعييش...

....

....

شباب عطلان...بلا عمل يتقدر...ولا تعليم يكبر...

يعمل إيه...غير إنه... عن المرار بالعنف... يعبر...

كل اللي خدوه من هذا البلد...الإهانة...والضرب اللي بجد يعور...

الروح بتشتكي جرحها...وطعم الحياة في حلقهم...علقم...ممرر...

....

....

على الولد ليه من سنين... ما حدش رد؟؟؟

بيقول...عايز يعيش حر...

بكرامة ...من غير قهر...

عايزحقه من خير مصر...

عليه كتير؟؟؟

محظور عليه...عن رأيه وطلباته يعبر؟؟

سايبينه لوحده...في عالم واسع محتار...

م الجوع...مش عارف حتى يفكر...

عرفتم ليه في المحلة...نازل بغضب عارم... بيكسر...

....

....

الجاي...عاتمة...كحل... لونه أسمر...

بلون بدلة سوده عليها نسر ...

رغم إنه لما تبصله حقيقي حجمه... صغير ...

لكن بعيد عنك... على ولاد بلده ... قوي أوي ومتجبر...

بقولك إيه...

ربك قادر يلطف...لوقدر...