بقولك إيه...

بقولك إيه...

تصدق...

مراتي بتشتغل عند واحدة...

دولابهم مليان..

والجزم من كل الألوان...

ولا الشنط... ماركات من كل البلدان...

ورغم إن الأكل عندهم بالكوم...

لكن بيرموه سليم...من غير أي إحساس باللوم...

أما أنا والعيال...

فهدمتنا واحدة...

وتفرج ببتنجانة... وبطاطس مقلية...

أو حتى طعمية...

وآخر مرة...البطاطا كانت التحلية...

رمضان اللي فات ما شفنا حتى مهلبية...

وهو يوم ورا يوم...

ما حد فينا بياخد غير رزق معلوم...

بس كتير بسأل نفسي...

وأنا واقف على سطحي...

في سجارتي بانفخ همي...

إحنا ليه بنلاقي اللقمة بطلوع الضرس...

وهما عندهم سهلة...

بس آل إيه... مالهومش نفس...